Cando brúa unha sirea
polas rúas da cidade
a xente ponse inqueda
e perde a tranquilidade.
Cando brúa unha sirea
co seu estridente son
¡a xente sinte a angustia
baterlle no corazón...!
Cando brúa unha sirea
con barullo escandaloso,
todo o mundo se pon triste,
silandeiro e temeroso.
Cando brúa unha sirea
de ambulancia ou policía:
¡o seu berro é un coitelo
de folla aceirada e fría!
Cando brúa unha sirea
de policía ou bombeiros:
¡o seu bruar mete medo
cos seus laídos tristeiros!
As rúas do vento ceibe (1979)
Ningún comentario:
Publicar un comentario